مشواري معك .......
الكنيسة هيي جماعة المؤمنين، هيي الشّعب اللي بالإيمان والمعموديّة، بيصير بأفرادو أبناء الله وإخوي ليسوع المسيح وهياكل الرّوح القدس.
ورسالة هالكنيسة، هيي إعلان ملكوت الله، هالإعلان اللي بلّش بالعهد القديم، وظهر بقوّي مع يسوع المسيح، ومن بعدو الرّسل، واليوم دور كلّ واحد منّا، تحت عنوان رسالة السّما اللي اترجمت بالكتاب المقدّس.
فكانت بالتّالي رسالة إنقاذ، وسط بحر من الخطايا ورمال متحرّكة اللي أغرقت قلب الإنسان حتّى حسّ إنّو ما بقى قادر يتحرّك. تدخّلت روح الله، بنعمي كبيري، لامست جسدنا الميّت ونفخت فينا الحياة.
كانت رسالة مرافقة، من خلال وعد الله الصّادق إلنا، بإنّو ما رح يتركنا أبدًا أيتام. هوّي دايمًا حاضر معنا حتّى انقضاء الدّهر، لنتخطّى كلّ الظروف الصعبي، ويخلق من الضعف قوّي، ومن الهزيمة إنتصار.
هيي كمان رسالة فرح، هالفرح الداخلي والعميق لأنّو نابع من قلب الله لكلّ مؤمن فيه. دعوتنا نظهر سلام المسيح اللي فينا للآخرين، لنعكس مدى عمق محبّة الله للكلّ.
وبقيت الكنيسة عبر تاريخها الطويل محافظة على عيش هالرّسالة تجاه الجميع، من شبيبة وأهل ومسنّين من جميع الفئات البشريّة، وخصوصًا الأولاد.
وبتشدّد الكنيسة على ضرورة العناية بالأطفال من خلال المحبّة اللي هيي أساس كلّ تربية.
المربّي بيعلّم، المربّي بيوصّي، المربّي بيكشف، المربّي بيعاقب وبيكافىء، المربّي هوّي المِثال.....
من هون دافعت الكنيسة باستمرار عن حقّ الأطفال بالتّربية، واعتبرتها بكلّ أشكالها جزء من رسالتها.
ونحنا علينا بدورنا – كأهل ومرافقين ومعلّمين، إكليروس وعلمانيين – نعتبر رسالتنا التّربويّة اليوميّة جزء من عمل الله الخلاصيّ، ومشاركة الكنيسة برسالتها التّعليميّة التّربويّة والرّسوليّة.
فالتّربية إذًا، منّا عمل فرديّ وإنّما عمل جماعة، جوهرها الإنسان وكلّ الإنسان.
إنطلاقًا من كلّ هالثوابت، ومتل كلّ سنة، انرفعت برعيّتنا – مار منصور النقّاش الضّبيّه - راية الإنطلاق بالمسيرة التّحضيريّة للمناولة الأولى.
الكلّ كشّف عن زنزدو، من كهنة وشمّاس وراهبات وعلمانيي من أعضاء لجنة المناولة الأولى وأعضاء من لجنة العيلة والجماعات العيلية. أراضي واسعة للحصاد، والفعلة استلموا البدار الخاصّة فيين، وكبّوها بالأرض الطيبي المخصّصة لكلّ لجنة.
وهيك بلّشت مسيرة فوج 2023 مع 51 ولدًا، بلقاءات التّنشئة لمدة شهريْن ونصف، ورتبة التّوبة، من بعدا التّمارين التّنظيميّة بالكنيسة لمدّة شهريْن، وصولًا للإحتفالات الموعودة، وقدّاس الشّكر، بحسب المواعيد التّاليّة :
السبت 13 أيار 2023 السّاعة  11:30 ق.ظ  (17 ولدًا)
السبت 13 أيار 2023 السّاعة  4:00   ب.ظ  (18 ولدًا)
الأحد  14 أيار 2023  السّاعة 12:30 ب.ظ  (16 ولدًا)
السبت 20 أيار  2023   السّاعة  6:00   مساء  (جميع الأولاد مع الأهل)